លោកជំទាវ ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ-១៩ បានណែនាំដល់អភិបាលរាជធានី-ខេត្តទាំង២៥ឱ្យពង្រឹងសកម្មភាពយុទ្ធនាការអប់រំផ្សព្វផ្សាយ និងជំរុញការចាក់វ៉ាក់សាំងកូវីដ-១៩ ជូនដល់ប្រជាពលរដ្ឋដែលជាក្រុមគោលដៅឱ្យបានគ្រប់ៗគ្នា។
ក្នុងលិខិតជូនដំណឹង លោកជំទាវ ឱ វណ្ណឌីន បានណែនាំអាជ្ញាធរទាំង២៥រាជធានី-ខេត្តដូចជា៖
ទី១. ត្រូវចាត់ចែងអប់រំ ផ្សព្វផ្សាយ ផ្ដល់ព័ត៌មានអំពីការចាក់វ៉ាក់សាំង និងលើកទឹកចិត្តដល់កុមារ និងប្រជាពលរដ្ឋអាយុចាប់ពី៦ឆ្នាំឡើងទៅ ឱ្យទៅទទួលការចាក់វ៉ាក់សាំងបង្ការជំងឺកូវីដ-១៩ឱ្យបានឆាប់បំផុត ដើម្បីបង្កើនភាពស៊ាំក្នុងសហគមន៍ កាត់បន្ថយការចម្លងវីរុសនេះបន្ថែមទៀត និងកាត់បន្ថយហានិភ័យនៃវីរុសកូវីដ-១៩បំប្លែងថ្មីដែលកំពុងលេចឡើង។
ទី២. ត្រូវតាមដានស្វែងរកអ្នកមិនទាន់បានចាក់វ៉ាក់សាំងក្នុងសហគមន៍ និងសិក្សាពីមូលហេតុជាក់លាក់ដែលពួកគេមិនអាចចាក់វ៉ាក់សាំងបាន ព្រមទាំងរកដំណោះស្រាយសមស្របដើម្បីជួយគាំទ្រប្រជាពលរដ្ឋឱ្យទទួលបានវ៉ាក់សាំងកូវីដ-១៩គ្រប់ៗគ្នា ដោយគ្មានការរើសអើសអ្វីទាំងអស់។
ទី៣. ត្រូវយកចិត្តទុកដាក់ផ្ដល់មធ្យោបាយគាំទ្រសមស្របដើម្បីជួយដល់ជនងាយរងគ្រោះ ដូចជា អ្នកមានជំងឺប្រចាំកាយមនុស្សចាស់ជរាខ្វះទីពឹង ជនពិការ សហគមន៍ក្រីក្រ សហគមន៍ឆ្ងាយដាច់ស្រយាលជាដើម ដើម្បីឱ្យពួកគេអាចទទួលវ៉ាក់សាំងកូវីដ-១៩គ្រប់គ្នា។
ទី៤. ត្រូវបន្តជំរុញការអប់រំ ផ្សព្វផ្សាយខ្លឹមសារនៃយុទ្ធនាការជាតិ “រួមគ្នាទទួលខុសត្រូវទប់ស្កាត់ការចម្លងវីរុសកូវីដ-១៩” ដល់បុគ្គល គ្រួសារ សហគមន៍ ជូនដល់ប្រជាពលរដ្ឋនៅតាមភូមិ ឃុំ សង្កាត់ ក្រុង រាជធានី-ខេត្តនៅទូទាំងប្រទេស តាមរយៈអាជ្ញាធរថ្នាក់ក្រោមជាតិ និងដោយមានការចូលរួមពីសហគមន៍ ដូចជាការផ្សព្វផ្សាយតាមរយៈឧគ្ឃោសនាសព្ទ ការបិទតាំងរូបភាពផ្ទាំងធំ ចែកចាយខិតប័ណ្ណ ការផ្សព្វផ្សាយតាមទូរទស្សន៍ វិទ្យុ និងបណ្ដាញសង្គមដល់ប្រជាជន ជាពិសេសដល់សហគមន៍ងាយរងគ្រោះ និងសហគមន៍ក្រីក្រជាដើម។
ទី៥. អាជ្ញាធរត្រូវណែនាំ និងចាត់វិធានការអប់រំ ផ្សព្វផ្សាយ និងតាមដានជាប្រចាំលើការអនុវត្តវិធានការសុខាភិបាលនៅតាមទីតាំងនានា ជាពិសេសទីតាំងដែលមានហានិភ័យខ្ពស់មានដូចជា ទីតាំងមានមនុស្សច្រើនជួបជុំគ្នា ទីតាំងបិទជិតមិនមានខ្យល់ចេញចូលគ្រប់គ្រាន់ និងទីតាំងដែលមានមនុស្សនៅជិតៗគ្នា ដូចជា នៅតាមទីផ្សារ ទីប្រជុំជន ភោជនីយដ្ឋាន ទីកន្លែងលក់អាហារ ផ្សារទំនើប ធនាគារ និងកន្លែងប្រកបអាជីវកម្មផ្សេងៗ។ ពោល អាជ្ញាធរណែនាំឱ្យម្ចាស់អាជីវកម្ម ឬហាងត្រូវពង្រឹង និងយកចិត្តទុកដាក់បន្ថែមទៅតាមការណែនាំរប់សក្រសួងសុខាភិបាល ដើម្បីបង្ការការឆ្លងដោយជាយថាហេតុនូវវីរុសកូវីដ-១៩ នៅពេលជួបជាមួយអតិថិជនៅក្នុងទីតាំងរបស់ខ្លួន។ ជាពិសេសអាជ្ញាធរត្រូវចាត់វិធានការរដ្ឋបាលដល់បុគ្គល ឬអាជីវកម្មណាដែលមិនគោរពតាមការណែរបស់ក្រសួងសុខាភិបាល។
គួរជម្រាបថា គិតត្រឹមថ្ងៃទី០៣ តុលា ឆ្នាំ២០២១ មានប្រជាពលរដ្ឋកម្ពុជាសរុបចំនួន១៣,៤៤១,០៩៣នាក់ហើយ បានចាក់វ៉ាក់សាំងបង្ការជំងឺកូវីដ-១៩ ស្មើនឹង៨៤,០១ភាគរយ បើធៀបនឹងចំនួនប្រជាជនសរុប១៦លាននាក់ ក្នុងនោះរួមមាន ប្រជាពលរដ្ឋអាយុពី១៨ឆ្នាំឡើងចំនួន៩,៩១១,៨១៨នាក់ ប្រជាពលរដ្ឋអាយុចាប់ពី១២ដល់ក្រោម១៨ឆ្នាំចំនួន១,៧៦៣,១៥០នាក់ និងប្រជាពលរដ្ឋអាយុពី៦ដល់ក្រោម១២ឆ្នាំចំនួន១,៧៦៦,១២៥នាក់៕
