(រតនគីរី)៖ ដើម្បីអបអរខួបទី១៥៨ នៃទិវាពិភពលោកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២១ ក្រោមប្រធានបទ “ទាំងអស់គ្នារួមជាមួយកាកបាទក្រហមកម្ពុជា ប្រយុទ្ធនឹងកូវីដ-១៩ និងកសាងភាពធន់របស់សង្គមជាតិ” នៅរសៀលថ្ងៃសៅរ៍ ទី០៨ ខែឧសភា ឆ្នាំ២០២១ ឯកឧត្តម ថង សាវុន ប្រធានគណៈកម្មាធិការសាខាកាកបាទក្រហមកម្ពុជា ខេត្តរតនគិរី និងសហការី បានអញ្ជេីញចុះសួរសុខទុក្ខ និងផ្តល់អំណោយមនុស្សធម៌ ជូនដល់កុមារកំព្រា នៅភូមិកុមារ អេស អូ អេស រតនគិរី ចំនួន ១០ខ្នងផ្ទះ ស្មើនឹង ១០៤នាក់ ស្រី៤៦នាក់ ស្ថិតនៅ ភូមិ៤ សង្កាត់កាចាញ ក្រុងបានលុង ខេត្តរតនគិរី។
ក្នុងឱកាសនោះ ឯកឧត្តម ថង សាវុន បានពាំនាំប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើការសួរសុខទុក្ខ ក្តីអាណិត ស្រឡាញ់ចំពោះកុមារ និងបុគ្គលិកទាំងអស់ ជាពិសេសការកោតសរសើរចំពោះទឹកចិត្តដ៏ថ្លៃថ្លា របស់ មេភូមិ អ្នកម្តាយ និងបុគ្គលិកអប់រំ ដែលបានយកអស់កម្លាំងកាយ-ចិត្ត មេីលថែទាំ ចិញ្ចឹមបីបាច់ ផ្តល់ភាពកក់ក្តៅ និងផ្តល់ការអប់រំ ដល់កុមារទាំងអស់ប្រកបដោយទឹកចិត្តមនុស្សធម៌ និងក្តីអាណិតស្រឡាញ់។ ទន្ទឹមនឹងនេះ ឯកឧត្តមប្រធាន បានកើតសរសើរដល់ភូមិកុមារ អេស អូ អេស បានចូលរួមចំណែកយ៉ាងធំធេងជាមួយរដ្ឋាភិបាលកម្ពុជា ក៏ដូចជារដ្ឋបាលខេត្តរតនគិរី ក្នុងការកាត់បន្ថយនូវ ភាពអនាថាកុមារ និងអំពើហិង្សាលើកុមារ និងបានផ្តល់ក្តីសង្ឃឹមដល់កុមារកំព្រាទាំងអស់ក្នុងការកសាងជោគវាសនារបស់ពួកគេឡើងវិញ។ ហើយឯកឧត្តមក៏បានផ្តាំផ្ញេីដល់ មេភូមិ អ្នកម្តាយ បុគ្គលិកអប់រំ និងក្មេងៗទាំងអស់ សូមបន្តចូលរួមប្រយុទ្ធនឹងជំងឺកូវីដ-១៩ ស្របតាមប្រធានបទ ទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា ឆ្នាំ២០២១ “ទាំងអស់គ្នារួមជាមួយកាកបាទក្រហមកម្ពុជា ប្រយុទ្ធនឹងកូវីដ-១៩ និងកសាងភាពធន់របស់សង្គមជាតិ” ដោយផ្លាស់ប្តូរឥរិយាបទក្នុងការរស់នៅជាធម្មតាតាមកន្លងថ្មី រក្សាអនាម័យដៃស្អាត ពាក់ម៉ាស់ក្នុងករណីចាំបាច់ និងការរក្សាគម្លាតពីគ្នា ពិសេសអនុវត្តនូវវិធានការ ៣ កុំ ៣ ការពារ របស់ប្រមុខរាជរដ្ឋាភិបាលប្រចាំផងដែរ។
ជាមួយគ្នានោះ លោក វ៉ា វលក្ខណ៍ មេភូមិកុមារ អេស អូ អេស រតនគិរី បានសម្តែងនូវការដឹងគុណយ៉ាងជ្រាលជ្រៅចំពោះ ឯកឧត្តម ថង សាវុន ប្រធានគណៈកម្មាធិការសាខាកាកបាទក្រហមកម្ពុជា ខេត្តរនតគិរី និងគណៈប្រតិភូអមដំណើរ ដែលបានយកចិត្ត ទុកដាក់ពីគិតគូរពីសុខទុក្ខក្មេងៗ ហើយបានឧបត្ថម្ភគ្រឿងឧបភោគបរិភោគដល់ក្មេងៗក្នុងទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២១នេះ។
សូមបញ្ជាក់ថា អំណោយប្រគល់ជូន រួមមាន ៖ អង្ករ១តោន មី១០កេស ទឹកត្រី១០យួរ ទឹកស៊ីអុីវ១០យួរ ៕
