ខេត្ដកំពង់ចាម៖ ឯកឧត្តម អ៊ុន ចាន់ដា ប្រធានសាខាកាកបាទក្រហមកម្ពុជាខេត្តកំពង់ចាម នៅព្រឹកថ្ងៃទី ២៤ ខែមេសា ឆ្នាំ ២០២១នេះរួមជាមួយក្រុមការងារ បានអញ្ជើញជួបសំណេះសំណាល និងនាំយកអំណោយសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ផ្តល់ជូនប្រជាពលរដ្ឋចំនួន ៧២គ្រួសារ នៅភូមិល្ពាក ឃុំស្រក ស្រុកកំពង់សៀម ដែលរងគ្រោះដោយ ខ្យល់កន្ត្រាក់ បណ្តាល អោយប៉ើង និងរបើកដំបូលផ្ទះ,សាលាឃុំ ព្រះវិហារ,កុដិ, វត្ត ចំនួន២ និងផ្ទះប្រជាពលរដ្ឋចំនួន ៧២ខ្នង កាលពីរសៀល ថ្ងៃទី២៣ ខែមេសា ឆ្នាំ២០២១។
ក្នុងឱកាសជួបសំណេះសំណាលនោះ ឯកឧត្តម អ៊ុន ចាន់ដា បានចូលរួមសម្តែងការសោកស្តាយជាខ្លាំង ជាមួយក្រុមគ្រួសាររងគ្រោះទាំងអស់ ចំពោះឧប្បត្តិហេតុដែលកើតឡើងដោយមិននឹកស្មានដល់ បង្កអោយមានការខូចខាត លំនៅដ្ឋានរបស់បងប្អូន បែបនេះ ។
ឯកឧត្តម អ៊ុន ចាន់ដា ក៏បានពាំនាំប្រសាសន៍ផ្តាំផ្ញើសួរសុខទុក្ខ ពីសំណាក់ ឯកឧត្តម ហ៊ុន ណេង ប្រធានកិត្តិយសសាខា ពិសេស សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះសុខទុក្ខ ប្រជាពលរដ្ឋគ្រប់រូប ជនរងគ្រោះ ជនងាយរងគ្រោះ ដោយមិនរើសអើងឡើយ ហើយតែងបានចាត់តំណាងអោយចុះអន្តរាគមន៍ផ្តល់ជំនួយសង្រ្គោះទាន់ពេលវេលាផងដែរ។
ជាមួយគ្នានោះដែរ ឯកឧត្តម អ៊ុន ចាន់ដា បានអំពាវនាវ ដល់ប្រជាពលរដ្ឋទាំងអស់ ឲ្យបង្កើនការថែទាំសុខភាព ការពារសុវត្ថិភាពផ្ទាល់ខ្លួន អោយបានគ្រប់ៗគ្នា ក្នុងការចូលរួមទប់ស្កាត់ ពីការឆ្លងនៃជំងឺកូវីដ-១៩ ដោយត្រូវអនុវត្តអោយខាងតែបាននូវ វិធានការ ” ៣ការពារ ៣កុំ និង ២ចូលរួម ” ពិសេស ត្រូវអនុវត្តអោយបានខ្ជាប់ខ្ជួនតាមសារណែនាំនានារបស់ក្រសួងសុខាភិបាល ដើម្បីកាត់ផ្តាច់ខ្សែចម្លង កុំអោយជម្ងឺកូវីដ-១៩ នេះរាតត្បាតចូលក្នុងគ្រួសារ និងសហគមន៍ ។
អំណោយមនុស្សធម៌ដែលបានផ្ដល់ជូនជនរងគ្រោះទាំង៧២គ្រួសារ ក្នុង១គ្រួសារ ទទួលបាន ៖ អង្ករ ២៥គក្រ,មី១កេស, ទឹកត្រី១យួរ,ទឹកស៊ីអ៊ីវ១យួរ, ត្រីខ១យួរ, ឃីត ១កញ្ចប់ មាន(មុង១ ភួយ១ សារុង១ ក្រមា១) អាវយឺត ២ ។
ជាមួយគ្នានោះដែរ ឯកឧត្តម វេង សាខុន ប្រធានក្រុមការងាររាជរដ្ឋាភិបាលកម្ពុជា ចុះជួយស្រុកកំពង់សៀម-ជើងព្រៃ ក៏បានផ្តល់ថវិកា ជូនចំពោះ អ្នកដែលខូចខាតធ្ងន់ ចំនួន ៩គ្រួសារ – ខូចខាតមធ្យមចំនួន ២៧គ្រួសារ និងអ្នកខូចខាតស្រាល ចំនួន៣៦គ្រួសារ ទទួលបាន ថវិកា តាមទំហំខូចខាតជាក់ស្តែង ដែលអស់ទឹកប្រាក់ សរុប ៣១.៣៧៤.៩០០ រៀលផងដែរ៕
