ឯកឧត្តម សោម ពិសិដ្ឋ អភិបាលខេត្តកែប នារសៀលថ្ងៃទី១០ មេសា ឆ្នាំ២០២១ បានអញ្ជើញចុះសំណេះសំណាល សួរសុខទុក្ខ និងនាំយកសម្ភារះប្រើប្រាស់ ផ្តល់ជូនបញ្ជាការដ្ឋានប្រតិបត្តិការសឹករងខេត្ត និងកំលាំងស្នងការដ្ឋាននគរបាលខេត្តកែប។
ក្នុងឱកាសនោះឯកឧត្តមអភិបាលខេត្ត បាន ផ្សព្វផ្សាយសេចក្តីសម្រេចលេខ៤៤ របស់រាជរដ្ឋាភិបាល និងសេចក្តីណែនាំលេខ០០៣ របស់រដ្ឋបាលខេត្ត និងផ្សព្វផ្សាយអំពី ស្ថានភាពនៃការឆ្លងរាលដាលជំងឺកូវីត១៩ នៅក្នុងប្រទេសកម្ពុជា កំពុងស្ថិតក្នុងដំណាក់កាលគួអោយព្រួយបារម្ម ពិសេសនៅរាជធានីភ្នំពេញ ។ ទោះបីមានការបិទទីតាំងមួយចំនួនជាបន្តបន្ទាប់ តែអត្រាឆ្លងរាលដាលនៅតែកើនឡើងជាលំដាប់ ដូច្នេះអ្វីដែលយើងត្រូវធ្វើនាពេលនេះ គឺការរឹតបន្តឹងការចល័តចេញ ចូល របស់បងប្អូនប្រជាពលរដ្ឋ ។
ឯកឧត្តមអភិបាលខេត្ត សង្កត់ធ្ងន់ថា ទោះបីខេត្តកែប ពុំមានឆ្លងបន្តពីម្នាក់ ទៅម្នាក់ក៏ដោយ តែអាជ្ញាធរខេត្ត នៅតែបង្កើនការប្រុងប្រយ័ត្នបំផុត ដោយបានត្រួតពិនិត្យយ៉ាងដិតដល់ គ្រប់ការធ្វើដំណើរចេញចូលរបស់បងប្អូនប្រជាពលរដ្ឋ និងបានបញ្ជូនបងប្អូងដែលត្រលប់ពីខេត្តផ្សេង ធ្វើចត្តាឡីស័កបានត្រឹមត្រូវ ក្រៅពីនេះបានបង្កើតយន្ដការត្រួតពិនិត្យតាមភូមិ មូលដ្ឋានរស់នៅរបស់ប្រជាជន ដើម្បីក្តាប់ព័ត៌មាន អោយជាប់ និងសេចក្តីណែនាំស្តីពីការរៀបចំពិធីបុណ្យចូលឆ្នាំថ្មីប្រពៃណីជាតិ ដោយមានវិធានការជាក់លាក់លើការអនុវត្តអោយបានម៉ឺងម៉ាត់នូវវិធានការសុខាភិបាល ពិសេសវិធានការ ៣ការពារ ៣កុំ របស់រាជរដ្ឋាភិបាល។ ក្នុងនោះដែរឯកឧត្តមអភិបាលខេត្តកែប បានផ្តល់ជូននៅអំណោយ ដោយក្នុងមួយអង្គភាព ទទួលបាន អង្ករ១តោន មី ២០កេស ទឹកស៊ីអ៊ីវ ១០ យួរ និងម៉ាស់មួយចំនួនផងដែរ ៕
