លោកជំទាវ មិថុនា ភូថង ប្រធានគណៈកម្មាធិការកាកបាទក្រហមកម្ពុជា ខេត្តកោះកុង នឹងចាត់មន្រ្តីកសិកម្ម ត្រូវធ្វើយ៉ាងណាសហការជាមួយអាជ្ញាធរភូមិឃុំស្រង់ទិន្នន័យពលរដ្ឋរងផលប៉ះពាល់ទឹកជំនន់ ដើម្បីផ្តល់ពូជស្រូវដាំស្តារឡើងវិញ។
ការប្រកាសបែបនេះ របស់លោកជំទាវប្រធានគណៈកម្មាធិការកាកបាទក្រហមកម្ពុជា ខេត្តកោះកុង ធ្វើឡើងក្រោយពិធីចែកអំណោយមនុស្សធម៌កាកបាទក្រហមកម្ពុជា ជូនពលរដ្ឋសរុប២២៤គ្រួសារ មកពីឃុំដងពែង និងឃុំជីខលើ អំឡុងពួកគាត់ជួបគ្រោះធម្មជាតិជំនន់ទឹកភ្លៀងជាង១សប្តាហ៍កន្លងមកនេះ។
លោកជំទាវលើកឡើងថា អាជ្ញាធរសមត្ថកិច្ចគ្រប់លំដាប់ថ្នាក់បានគិតគូរយកចិត្តទុកដាក់ជម្លៀសពលរដ្ឋទៅរកទីទួលសុវត្ថិភាព ដើម្បីចៀសផុតគ្រោះធម្មជាតិដែលកំពុងកើតមានដោយមិនឱ្យពលរដ្ឋណាស្លាប់នោះទេ។ ទោះបីជាមានការខូចខាតផលដំណាំ ផ្ទះសម្បែង សត្វគោក្របី ក៏ដោយ។
លោកជំទាវ មិថុនា ភូថង បន្តចាត់មន្រ្តីអាជ្ញាធរពាក់ព័ន្ធបន្តតាមដានពិនិត្យ និងត្រៀមជួយសង្រ្គោះពលរដ្ឋនៅតំបន់ប្រឈមគ្រប់ពេលវេលា ព្រោះថា អាកាសធាតុតែងប្រែប្រួលមិនទៀងទាត់ដែលងាយបង្កជាទឹកជំនន់លិចលង់ប្រជាពលរដ្ឋ។
បន្ថែមលើនេះ លោកជំទាវប្រធានគណៈកម្មាធិការកាកបាទក្រហមកម្ពុជាខេត្តកោះកុង ក៏បានពាំនាំនូវការសួរសុខទុក្ខរបស់សម្តេចកត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដោយសម្តេចមិនព្រងើយកន្តើយនឹងភាពរងគ្រោះរបស់ពលរដ្ឋណាម្នាក់ឡើយ ពោលគឺសម្តេចតែងចាត់ឱ្យក្រុមការងារចុះជួយអន្តរាគមន៍សង្រ្គោះ និងចែកស្បៀងអាហារសម្រាប់បរិភោគជាបណ្តោះអាសន្នសិនទំរាំអាកាសធាតុវិលមករកភាពល្អប្រសើរធម្មតាវិញ។
យោងតាមរបាយការណ៍របស់លោក ជា ច័ន្ទកញ្ញា អភិបាលស្រុកស្រែអំបិលបង្ហាញថា លំនៅដ្ឋានពលរដ្ឋភូមិបានទៀត ឃុំដងពែង ប្រមាណ៣០ខ្នងផ្ទះបានបាក់រំលំ និងរបើកដំបូល និងមានមនុស្សម្នាក់ស្លាប់ រីឯរបួសធ្ងន់ស្រាល៧នាក់ កាលពីយប់ថ្ងៃទី៣០ ខែកក្ដដា ឆ្នាំ២០២៣កន្លងទៅ។
លោកអភិបាលស្រុកស្រែអំបិល បន្ថែមថា ក្រៅពីនេះ គិតមកទល់ម៉ោងនេះ មានផ្ទះពលរដ្ឋ២២៤ខ្នងផ្ទះរងជំនន់ទឹកភ្លៀង ក្នុងនោះមានភូមិព្រះកែវ បាក់អង្រុត និងភូមិពោធិបឹងនៅក្នុងឃុំដងពែង និងឃុំជីខលើ។ តបតាមទំនួលខុសត្រូវខ្ពស់ចំពោះតួនាទីភារកិច្ច អាជ្ញាធរមូលដ្ឋាន ប្រុងជើងការជានិច្ច ត្រៀមចុះអន្តរាគមន៍ជួយសង្រ្គោះពលរដ្ឋនៅតំបន់ដែលងាយប្រឈមនឹងការជំនន់លិចទឹកភ្លៀង៕
