ឯកឧត្តម ផៃ ស៊ីផាន អ្នកនាំពាក្យរាជរដ្ឋាភិបាល បានមានប្រសាសន៍ថា ការកសាងហេដ្ឋារចនាសម្ព័ន្ធគឺជាយុទ្ធសាស្ត្ររបស់រាជរដ្ឋាភិបាលក្នុងការបង្កើត និងពង្រឹងសេដ្ឋកិច្ចជាតិ ជាពិសេសនៅបន្ទាប់ពីកម្ពុជាងើបចេញពីវិបត្តិជំងឺកូវីដ-១៩។
ឯកឧត្តមអ្នកនាំពាក្យរាជរដ្ឋាភិបាល បានបន្តថា រដ្ឋាភិបាលក៏បាននិងកំពុងកសាងនូវភាពធន់ដើម្បីឆ្លើយតបជាមួយនិងការប៉ះពាល់ពីវិបត្តិសង្គ្រាមរុស្ស៊ី-អ៊ុយក្រែន និងវិបត្តិពាណិជ្ជកម្មរវាងប្រទេសមួយចំនួន។ ដូច្នេះក្រៅពីការបន្ថែមក្នុងការរកទីផ្សារថ្មីសម្រាប់ការនាំចេញផលិតផលកសិកម្ម ឬផលិតផលឧស្សាហកម្មកាត់ដេរ គឺរដ្ឋាភិបាលនឹងបង្កើនបណ្ដាញផ្ទៃក្នុងដើម្បីតភ្ជាប់ចរន្តក្នុងស្រុកទៅនឹងថ្នាក់តំបន់បន្ថែមទៀត។
ឯកឧត្តម ផៃ ស៊ីផាន ក៏បានអះអាងថា កសាងហេដ្ឋារចនាសម្ព័ន្ធសំខាន់ៗជាបន្តបន្ទាប់នេះ ពិតជាអាចឆ្លុះបញ្ចាំង និងបង្ហាញយ៉ាងច្បាស់បំផុតពីភាពរីកចម្រើនរបស់កម្ពុជា ប៉ុន្តែក្រៅពីហេដ្ឋារចនាសម្ព័ន្ធរដ្ឋាភិបាលក៏បានយកធនធានមនុស្សជាអាទិភាពក្នុងការអភិវឌ្ឍប្រទេស។