អ្នកនាំពាក្យគណបក្សប្រជាជនកម្ពុជា ឯកឧត្តម សុខ ឥសាន បានមានប្រសាសន៍ថា មហាសន្និបាតវិសាមញ្ញ គណបក្សប្រជាជនកម្ពុជាមានគោលបំណងសំខាន់ៗ ដូចជា ការត្រួតពិនិត្យលទ្ធផលការងារ ពីឆ្នាំ២០១៨ ដល់ឆ្នាំ២០២៣ ការពិនិត្យកម្មវិធីអភិវឌ្ឍន៍ប្រទេសពីឆ្នាំ២០២៤ ដល់ឆ្នាំ២០២៨ និងចំណុចសំខាន់មួយទៀត គឺការណែនាំទៅក្រុមការងារគណបក្សឱ្យពង្រឹងការងារចុះមូលដ្ឋាន ដើម្បីដណ្ដើមជ័យជម្នះក្នុងការបោះឆ្នោតនាពេលខាងមុខ។
ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជា បានអះអាងថា គណបក្សប្រជាជនកម្ពុជា ជាគណបក្សស្អាតស្អំ ដូច្នេះគឺមិនរៀបចំយុទ្ធសាស្ត្រណាមួយ ដែលជាការធ្វើទុក្ខបុកម្នេញលើគណបក្សគូប្រកួតប្រជែងរបស់ខ្លួនឡើយ។
ឯកឧត្តម សុខ ឥសាន បានមានប្រសាសន៍បន្តថា គណបក្សត្រូវខិតខំយកអស់កម្លាំងកាយកម្លាំងចិត្ត ដើម្បីជំរុញការងារទាំងឡាយ ដែលជាតួនាទីភារកិច្ចរបស់គណបក្សកាន់អំណាចដើម្បីឱ្យប្រជាជនលោកមើលឃើញស្នាដៃ និងគុណសម្បត្តិទាំងឡាយរបស់គណបក្ស ដោយធានាបានគុណភាព និងបរិមាណ និយាយរួមគឺគ្រប់វិស័យនៅក្នុងការងារដែលគណបក្សប្រជាជន ដែលជាគណបក្សកាន់អំណាចនេះបានធ្វើ។