ភ្នំពេញៈ រាជរដ្ឋាភិបាលកម្ពុជា បានចំណាយថវិកាជិត ៩០០ លានដុល្លារអាមេរិក សម្រាប់ឧបត្ថម្ភសាច់ប្រាក់ជូនគ្រួសារក្រីក្រ និងជនងាយរងគ្រោះ អំឡុងពេល ប្រយុទ្ធនឹងជំងឺកូវីដ ១៩ ដែលក្នុងនោះប្រជាពលរដ្ឋ ជាង ២ លាន ៧ សែននាក់ បានទទួលប្រាក់ពីការឧបត្ថម្ភនេះ។
សេចក្តីជូនដំណឹងរបស់ក្រសួងសង្គមកិច្ច អតីតយុទ្ធជន និងយុវនីតិសម្បទា ឱ្យដឹងថា គិតចាប់ពីថ្ងៃទី ២០ ខែមិថុនា ឆ្នាំ ២០២០ ដល់ថ្ងៃទី២៤ ខែធ្នូ ឆ្នាំ ២០២២ រដ្ឋាភិបាលកម្ពុជា បានអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងជនងាយរងគ្រោះក្នុងអំឡុងពេលប្រយុទ្ធនឹងកូវីដ ១៩ មានចំនួន ១១ ជុំ និង ៣០ លើក ដោយក្នុងនោះបានចំណាយទឹកប្រាក់ចំនួន ៨៩៩,៩០ លានដុល្លារអាមេរិក។
ក្រសួងបន្តថា ក្នុងនោះចំនួនសមាជិកគ្រួសារសរុបដែលទទួលបានពីការឧបត្ថម្ភនេះ មានចំនួន ២ ៧៨៣ ៨០៣ នាក់ នៃចំនួន ៧០៥ ៧៦៦ គ្រួសារ។ ពលរដ្ឋដែលទទួលផល ក្នុងនោះកុមារចាប់ពីអាយុ ០-៥ ឆ្នាំ មានចំនួន ១៦៥ ៤២៦ នាក់ មនុស្សវ័យចាស់ អាយុពី ៦០ ឆ្នាំឡើងទៅ ចំនួន ៣៦៥ ៧៤២ នាក់ ជនមានពិការភាពចំនួន ៦៤ ៤៣៧ នាក់ និងគ្រួសារដែលមានជំងឺអេដស៍ មានចំនួន ២០ ៣៨ នាក់។
សម្រាប់ការបើកផ្តល់ប្រាក់ឧបត្ថម្ភជុំទី ១១ លើកទី ៣ នឹងចាប់ផ្តើមពីថ្ងៃទី ២៥ ខែធ្នូ ឆ្នាំ ២០២២ ដល់ថ្ងៃទី ២៤ ខែមករា ឆ្នាំ ២០២៣ ដែលមានរយៈពេល ៣០ ថ្ងៃ សម្រាប់ ទៅដកប្រាក់។ ក្រសួងសង្គមកិច្ច ស្នើឱ្យអ្នកទទួលផលទាំងអស់ប្រើប្រាស់ថវិកា ដែលទទួលបានពីកម្មវិធីឱ្យបានត្រឹមត្រូវ ដោយចៀសវាងការប្រើប្រាស់ ក្នុងគោលបំណងបម្រើឱ្យអបាយមុខផ្សេងៗ ដែលនាំឱ្យប៉ះពាល់ដល់ការអនុវត្ត គោលនយោបាយរបស់រាជរដ្ឋាភិបាល ក្នុងការផ្តល់ការអន្តរាគមន៍ជំនួយសង្គមជាសាច់ប្រាក់នេះ។