ភ្នំពេញ៖អ្នករកស៊ីស្រូវអង្ករកម្ពុជាស្នើឱ្យក្រសួងកសិកម្មជួយជំរុញខ្សែច្រវាក់ផលិតកម្មក្នុងការនាំចេញស្រូវអង្ករ ទៅទីផ្សារដែលមានសក្ដានុពល ជាពិសេសទីផ្សារថ្មីៗ ដើម្បីផ្ដល់ប្រាក់់ចំណូលជូនដល់កសិករ។ការស្នើឡើងនេះ នៅក្នុងជំនួបរវាងរដ្ឋមន្ត្រីក្រសួងកសិកម្មថ្មី និងសហព័ន្ធស្រូវអង្ករកម្ពុជា កាលពីថ្ងៃទី៣១ ខែតុលា ឆ្នាំ២០២២ ក្នុងគោលបំណងផ្តោតលើផលិតកម្មពូជស្រូវ និងការនាំចេញអង្ករ។
លោក ហ៊ុន ឡាក់ ប្រធានក្រុមប្រឹក្សាភិបាលសហព័ន្ធស្រូវអង្ករកម្ពុជា បានប្រាប់ថា ជំនួបប្រជុំព្រឹកមិញនេះ បានដឹកនាំដោយរដ្ឋមន្រ្តីក្រសួងកសិកម្ម ឯកឧត្តម ឌិត ទីណា ដែលបានពិគ្រោះគ្នាក្នុងការផ្ដោតសំខាន់ទៅលើផលិតកម្មពូជស្រូវ និងការនាំចេញអង្ករ។
លោក ហ៊ុន ឡាក់ថា៖ «ក្នុងកិច្ចប្រជុំនេះ រដ្ឋមន្ត្រីកសិកម្មបានលើកយកបញ្ហាអាទិភាពចំពោះមុខ គឺធ្វើយ៉ាងណារៀបចំផែនការជាបន្ទាន់រយៈពេលខ្លី ដែលជាផែនការជំរុញផលិតកម្មពូជស្រូវសែនក្រអូបសូន្យមួយ ដែលបានបញ្ចេញដោយកាឌី ហើយពូជស្រូវហ្នឹង គឺចង់ផ្ដោតទៅលើពូជស្រូវភាពសុទ្ធល្អ ដែលចំណាយពូជស្រូវតិច និងផលិតបាននូវទិន្នផលខ្ពស់ ហើយធន់នឹងជំងឺ និងសត្វល្អិត»។
លោកថា ផែនការផលិតពូជស្រូវនេះ គឺរដ្ឋមន្រ្តីក្រសួងកសិកម្មបានលើកទឹកចិត្តឱ្យមានការចូលរួមពីវិស័យឯកជនជាពិសេសពីភាគីពាក់ព័ន្ធទាំងអស់នៃសហព័ន្ធស្រូវអង្ករកម្ពុជា ត្រូវធ្វើយ៉ាងណា រៀបចំកិច្ចសន្យាទទួលទិញអំពីផលិតផលស្រូវរបស់កសិករ ដែលពួកគាត់ទទួលយកពូជនេះមកដាំ។
លោកបន្ថែមថា ៖ «ខាងសហព័ន្ធស្រូវអង្ករ ក៏បានលើកឡើងពីបញ្ហាប្រឈមមួយចំនួន ចំពោះកសិករដែលបានប្រើប្រាស់ពូជតំណគ្នា ។ពូជក្លាយ ដែលធ្វើឱ្យទិន្នផលស្រូវទាប ហើយភាពសុទ្ធនៃគ្រាប់អង្ករ ត្រូវធ្លាក់ចុះ»។
ចំណែកអ្នកស្រី គឹម ស្រីរ័ត្ន អនុប្រធានសហព័ន្ធស្រូវអង្គរកម្ពុជា បានប្រាប់ថាការប្រជុំព្រឹកនេះ ខាងសហព័ន្ធស្រូវ-អង្ករកម្ពុជាបានសំណូមពរទៅក្រសួងកសិកម្មឱ្យមានការវិនិយោគបន្ថែមលើការគ្រប់គ្រងដំណាំស្រូវ។ រៀបចំយុទ្ធសាស្ត្រស្រូវអង្ករក្នុងដំណាក់កាលថ្មី ២០២៣-២០៣០ និងស្នើឱ្យគ្រប់ក្រសួងធ្វើការរួមគ្នា ដើម្បីធ្វើបច្ចុប្បន្នភាពនៃផ្ទៃដីដាំដុះស្រូវឡើងវិញ។
ក្រៅពីនេះទៀត អ្នកស្រីថា ស្នើឱ្យក្រសួងកសិកម្មត្រូវរៀបចំយុទ្ធនាការផ្សព្វផ្សាយទៅកាន់កសិករ លើជំនាញបច្ចេកទេសដាំដុះ ការប្រើប្រាស់ជី ថ្នាំពុលកសិកម្ម និងពូជ ក្នុងកម្រិតទ្រង់ទ្រាយធំ តាមរយៈការផលិតវីឌីដេអូផ្សព្វផ្សាយនិងសុំឱ្យក្រសួងកសិកម្មត្រូវរៀបចំការចុះបញ្ជីចំនួនរោងម៉ាស៊ីនកិនស្រូវទៅប្រទេសចិនបន្ថែមទៀត ទោះបីជាការងារនេះ ត្រូវបានឯកភាពជាគោលការណ៍ពីអគ្គនាយកដ្ឋានកសិកម្មរួចហើយក៏ដោយ។
អ្នកស្រី គឹម ស្រីរ័ត្នថា៖ «យើងចង់ឱ្យក្រសួងកសិកម្មផ្តោតទៅលើការផលិតស្រូវពូជ ដែលមានគុណភាពល្អ សុទ្ធល្អ ហើយចែកចាយទៅឱ្យក្រុមហ៊ុនឯកជន ឬមួយកសិករសហគមន៍ណា ដែលគាត់អាចយកទៅធ្វើស្រូវពូជ ហើយបន្តចឹងទៅទៀតបាន ដើម្បីយើងកិនជាអង្ករមកបានភាពសុទ្ធ មានគុណភាពល្អ»។
អ្នកស្រីបន្តថា កាលពីឆ្នាំមុនៗ ខាងសហព័ន្ធមានអង្ករសែនក្រអូប និងអង្កររំដួល ដែលភាពសុទ្ធ ត្រូវបានធ្លាក់ចុះដោយសារកត្តាកសិករពេលខ្លះពួកគាត់បានប្រើប្រាស់ពូជស្រូវដដែលៗច្រើនដងពេក ដោយមិនបានទិញពូជល្អៗពីកន្លែងលក់ឬមួយក៏ពួកគាត់ដាំដុះទៅ វាមានការឆ្លងពីពូជមួយទៅពូជមួយទៀត។ដូច្នេះហើយវាធ្វើឱ្យគុណភាពអង្ករឆ្នាំមុនៗ មានការធ្លាក់ចុះ។
អ្នកស្រីបន្ថែមថា៖ «និយាយសរុបជារួមមក គឺផ្ដោតទៅលើការអភិវឌ្ឍនិងការធ្វើឱ្យប្រសើរឡើងផ្នែកគុណភាពស្រូវ ឱ្យចេញជាអង្ករល្អ គុណភាពល្អ ហើយមានតម្លៃសមរម្យ»។
រដ្ឋមន្ត្រីក្រសួងកសិកម្មឯកឧត្តម ឌិត ទីណា ទទួលស្គាល់ថាការងារជាអាទិភាពចំពោះមុខ គឺផែនការសកម្មភាពស្ដីពីការជំរុញផលិតកម្មនិងការប្រើប្រាស់ពូជស្រូវដែលមានគុណភាពល្អក្នុងបរិមាណទាប តែផ្ដល់ទិន្និផលស្រូវខ្ពស់។ លោកថា ការជ្រើសរើសពូជក៏ត្រូវអត្រាដុះខ្ពស់ ធំលឿន មានកម្លាំងខ្លាំង ធន់នឹងជំងឺនិងសត្វល្អិត ទុំស្រុះគ្នាល្អ និងមានអត្រាលាយគ្រាប់ពូជផ្សេងនិងគ្រាប់ខ្មៅចង្រៃទាប ដែលនឹងរួមចំណែកឱ្យស្រូវអង្ករមានតម្លៃខ្ពស់នៅលើទីផ្សារ។ឯកឧត្តមលើកទឹកចិត្តឱ្យមានការចូលរួមពីគ្រប់ភាគីពាក់ព័ន្ធទាំងអស់ ជាពិសេសវិស័យឯកជន ដើម្បីធានាថា ពូជស្រូវសុទ្ធដែលប្រជាកសិករផលិតបាន នឹងមានទីផ្សារទទួលទិញយកទៅដាំដុះបន្ត។ឯកឧត្តមរដ្ឋមន្ត្រីស្នើឱ្យភាគីពាក់ព័ន្ធសិក្សាអំពីប្រភេទអង្ករដែលជាតម្រូវការនៅលើទីផ្សារអន្ដរជាតិ ហើយជំរុញការផលិតស្របទៅតាមតម្រូវការជាក់ស្ដែង។
ទិន្នន័យពីសហព័ន្ធវអង្ករកម្ពុជាបានបង្ហាញថា ក្នុងរយៈពេលប្រាំបួនខែនៃឆ្នាំ២០២២នេះ កម្ពុជាមាននាំចេញជិត៤៥ម៉ឺនតោន គិតជាទឹកប្រាក់ជាង២៨៦លានដុល្លារអាមេរិក ទៅកាន់គោលដៅចំនួន៦០ប្រទេស ដែលក្នុងនោះមានតំបន់មជ្ឈិមបូព៌ាផងដែរ៕