ភ្នំពេញៈ កំណើនសេដ្ឋកិច្ចកម្ពុជានៅឆ្នាំ ២០២៣ ខាងមុខត្រូវព្យាករថា នឹងសម្រេចបានអត្រាកំណើន ៦,៦ ភាគរយ ខណៈផលិតផលក្នុងស្រុកសរុប (ផសស) សម្រាប់មនុស្សម្នាក់ នឹងកើនដល់ ១ ៩២៤ ដុល្លារ។ នេះបើយោងតាមក្រសួងសេដ្ឋកិច្ច និងហិរញ្ញវត្ថុ។
សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៣ ដែលរៀបចំដោយក្រសួងសេដ្ឋកិច្ច និងហិរញ្ញវត្ថុ និងត្រូវបានគណៈរដ្ឋមន្ត្រីអនុម័តទាំងស្រុងក្នុងកិច្ចប្រជុំ កាលពីថ្ងៃទី ២៨ ខែតុលា បានឱ្យដឹងថា តាមការព្យាករកំណើនសេដ្ឋកិច្ចកម្ពុជាក្នុងឆ្នាំ ២០២៣ ខាងមុខ នឹងសម្រេចបានកំណើនអត្រា ៦,៦ ភាគរយ ដែលធ្វើឱ្យ ផសស ថ្លៃបច្ចុប្បន្នស្ថិតក្នុងរង្វង់ ១៣១ ២៧៦ ពាន់ លានរៀល ឬសមមូលនឹង ៣២ ២៩១ លានដុល្លារ ស្របពេលដែល ផសស សម្រាប់មនុស្សម្នាក់ត្រូវបានរំពឹងថា នឹងកើនឡើងដល់ ១ ៩២៤ ដុល្លារ បើធៀបនឹង ១ ៧៨៥ ដុល្លារ ក្នុងឆ្នាំ ២០២២។
ក្រសួងសេដ្ឋកិច្ចបានលើកឡើងថា៖ «កំណើនសេដ្ឋកិច្ចកម្ពុជាឆ្នាំ ២០២៣ នឹងត្រូវគាំទ្រដោយវិស័យសេដ្ឋកិច្ចសំខាន់ៗចំនួន ៣ គឺឧស្សាហកម្ម, សេវាកម្ម, និងកសិកម្ម»។