(រដ្ឋធានីហាណូយ)៖ ក្នុងឱកាសបំពេញទស្សនកិច្ចផ្លូវរដ្ឋនៅសាធារណរដ្ឋសង្គមនិយម វៀតណាម នាព្រឹកថ្ងៃអង្គារ ១កើត ឆ្នាំខាល ចត្វាស័ក ព.ស ២៥៦៦ ត្រូវនឹងថ្ងៃទី២៥ ខែតុលា ឆ្នាំ២០២២ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នៃព្រះរាជាណាចក្រកម្ពុជា បានដឹកនាគណ:ប្រតិភូជាន់ខ្ពស់ព្រឹទ្ធសភា ចូលសម្តែងការគួរសម និងសវនការជាមួយ ឯកឧត្តម ង្វៀន ស៊ុនហ្វុក ប្រធានរដ្ឋមន្ត្រី នៃសាធារណរដ្ឋសង្គមនិយមវៀតណាម នៅវិមានប្រធានរដ្ឋ នាទីក្រុងហាណូយ។
សម្តេចប្រធានព្រឹទ្ធសភា បាននាំមកជាមួយនូវព្រះរាជបណ្តាសួរសុខទុក្ខ និងពាក្យផ្តាំផ្ញើសួរសុខទុក្ខប្រកបដោយសេចក្តីរាប់អាន និងសេចក្តីនិករលឹកអំពី ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា, សម្តេចព្រះមហាក្សត្រី នរោត្តម មុនីនាថ សីហុនុ, អំពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា, អំពី សម្តេចមហាពញាចក្រី ហេង សំរិន ប្រធានរដ្ឋសភា ជូនឯកឧត្តមប្រធានរដ្ឋ ព្រមទាំងថ្នាក់ដឹកនាំជាន់ខ្ពស់ទាំងអស់ នៃសាធារណរដ្ឋសង្គមនិយមវៀតណាម។
ក្នុងជំនួបពិភាក្សា ភាគីទាំងពីរបានពិភាក្សាគ្នាក្នុងមនោសញ្ចេតនាមិត្តភាព សាមគ្គីភាព និងសហប្រតិបត្តិការស្ថិតស្ថេរយូរអង្វែង។
សូមបញ្ជាក់ថា ឆ្នាំ២០២២នេះ ជាខួបលើកទី៥៥ នៃថ្ងៃបង្កើតទំនាក់ទំនងការទូតរវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម និងជាឆ្នាំមិត្តភាពកម្ពុជា-វៀតណាមផងដែរ។
