នាព្រឹកថ្ងៃទី២០ ខែតុលា ឆ្នាំ ២០២២ ឯកឧត្តមរដ្ឋមន្រ្តី ឌិត ទីណា បានចុះសួរសុខទុកប្រជាពលរដ្ឋនៅក្នុង ឃុំចំនួន៤គឺឃុំកៀនជ្រៃ ឃុំរចេក ឃុំហាន់ជ័យ និងឃុំគគរ ស្រុកកំពង់សៀម ខេត្តកំពង់ចាម ដែលទទួលរងផលប៉ះពាល់ដោយគ្រោះទឹកជំនន់ និងមានការខូចខាតផលដំណាំអស់ជាច្រើនហិកតា។ ក្នុងឱកាសនោះដែរ ឯកឧត្តម បានចែកស្រូវពូជដល់បងប្អូនកសិករចំនួន ៤៩៧គ្រួសារ ផងដែរ ដើម្បីអាចសាបព្រោះបានទាន់ពេលវេលា នៅពេលដែលទឹកស្រកចុះវិញ។
បន្ទាប់មកឯកឧត្តម បានចុះពិនិត្យដល់វាលស្រែដែលទទួលរងការខូចខាតមួយចំនួន និងផ្ទៃដីដែលអាចស្តារឡើងវិញបាន សម្រាប់ការបង្កបង្កើនផលស្រូវ និងដំណាំផ្សេងៗ។
នាឱកាសនោះ ឯកឧត្តមរដ្ឋមន្រ្តី បានលើកឡើងថា បើទោះបីជាមានជំនួយពីគ្រឿងយន្កសិកម្មក៏ពិតមែន ប៉ុន្តែការងារនេះមិនស្រួលពេកទេ បងប្អូនប្រជាពលរដ្ឋ មានការប្រឹងប្រែងណាស់ និងមានការនឿយហត់ជាខ្លាំង។
ជាចុងក្រោយ ឯកឧត្តម បានថ្លែងអំណរគុណដល់បងប្អូនប្រជាកសិករនៅខេត្តកំពង់ចាមថ្ងៃនេះដែល បានចំណាយពេលវេលាអញ្ជើញចូលរួមនៅក្នុងកម្មវិធីសំណេះសំណាលនេះ ប្រកបដោយបរិយាកាសស្និទស្នាល។
