ប្រធានាធិបតីរុស្សីលោក វ្ល៉ាឌីមៀ ពូទីន និងប្រធានាធិបតីចិនលោក ស៊ី ជីនពីង នឹងពិភាក្សាអំពីភាពតានតឹងនៅអឺរ៉ុប និងសំដី «អរិភាព» របស់សហរដ្ឋអាមេរិក និងអង្គការណាតូ ក្នុងអំឡុងពេលមានការឆ្លើយឆ្លងគ្នាតាមរយៈប្រព័ន្ធវីដេអូ នៅថ្ងៃពុធ នេះបើតាមការលើកឡើងរបស់វិមានក្រឹមឡាំង។
ការសន្ទនានេះធ្វើឡើងចំពេលដែលភាពតានតឹងកំពុងកើនឡើងក្នុងទំនាក់ទំនងរបស់ប្រទេសទាំងពីរជាមួយនឹងលោកខាងលិច ជុំវិញការចោទប្រកាន់ក្រុងប៉េកាំងបានរំលោភសិទ្ធមនុស្ស និងការចោទប្រកាន់ក្រុងមូស្គូថាត្រៀមធ្វើការឈ្លានពានប្រទេសអ៊ុយក្រែន។
អ្នកនាំពាក្យវិមានក្រឹមឡាំងលោកឌីមីទ្រី ប៉េស្កូវបាននិយាយថា៖ «ស្ថានការណ៍ក្នុងការបរទេស ជាពិសេសនៅទ្វីបអឺរ៉ុប មានភាពតានតឹងខ្លាំងណាស់នាពេលបច្ចុប្បន្ន ហើយទាមទារឱ្យមានការពិភាក្សាគ្នារវាងសម្ព័ន្ធមិត្ត»។
លោកបន្ថែមទៀតថា៖ «យើងឃើញសំដីអរិភាពខ្លាំងណាស់ពីភាគីណាតូ និងសហរដ្ឋអាមេរិកហើយនេះទាមទារឱ្យមានការពិភាក្សារវាងយើង និងចិន»៕