រាជធានីភ្នំពេញ៖ សម្តេចក្រឡាហោម ស ខេង ក្នុងនាមអនុប្រធានគណបក្សប្រជាជនកម្ពុជា និងជាឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រកាសជំហរ ជុំវិញបេក្ខភាពនាយករដ្ឋមន្ត្រីរបស់គណបក្សប្រជាជនកម្ពុជា។ នោះគឺសម្តេច ស ខេង ដែលជាថ្នាក់ដឹកនាំសំខាន់ទី២ ក្នុងគណបក្សប្រជាជនកម្ពុជា បានប្រកាសគាំទ្រ និងគោរពតាមសន្និបាតគណបក្ស។
យោងតាមលិខិតជូនជនរួមជាតិ នៅព្រលប់ថ្ងៃទី៧ ខែធ្នូ ឆ្នាំ២០២១ ដែលប្រើរូបសញ្ញាគណបក្សប្រជាជនកម្ពុជា សម្តេចក្រឡាហោម ស ខេង បានលើកឡើង ២ចំណុច រួមមាន៖ ១-ខ្ញុំតែងតែគោរព និងគាំទ្រសេចក្តីសម្រេចរបស់មហាសន្និបាត និងសន្និបាតរបស់គណបក្សប្រជាជនកម្ពុជា ក្នុងការជ្រើសតាំង សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ជានាយករដ្ឋមន្ត្រី សម្រាប់អាណត្តិនេះ និងអាណត្តិបន្តបន្ទាប់ទៀត។ ២-ចំពោះការជ្រើសរើសបេក្ខភាពនាយករដ្ឋមន្ត្រី នាពេលអនាគត ខ្ញុំក៏នឹងគោរពតាមការសម្រេចរបស់គណបក្សប្រជាជនកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន ជាប្រធាន»។
សូមជម្រាបថា សម្តេចក្រឡាហោម ស ខេង អនុប្រធានគណបក្សប្រជាជនកម្ពុជា បានចេញប្រកាសជាចំហរជូនជនរួមជាតិខាងលើនេះ បានធ្វើឡើង នៅលើផេកផ្លូវការរបស់សម្តេច ហើយក៏ធ្វើឡើង នៅក្រោយកិច្ចប្រជុំរវាងសម្តេច និងសម្តេចតេជោ នាយករដ្ឋមន្ត្រី ហ៊ុន សែន នៅថ្ងៃទី៨ ខែធ្នូ ឆ្នាំ២០២១ នេះ។
សូមរម្លឹកជូនថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី២ ខែធ្នូ ឆ្នាំ២០២១ ក្នុងពិធីសម្ពោធផ្លូវ នៅខេត្តព្រះសីហនុ បានប្រកាសពីការជ្រើសតាំងកូនប្រុសរបស់សម្តេច គឺឯកឧត្តម ហ៊ុន ម៉ាណែត ជាបេក្ខជននាយករដ្ឋមន្ត្រី បន្តពីសម្តេច ហើយដែលមានការគាំទ្រពីសម្តេច។ ភ្លាមៗ ញត្តិគាំទ្រ ត្រូវបានធ្វើឡើងជាបន្តបន្ទាប់មកពីគ្រប់ទិសទី តាំងពីមូលដ្ឋាន រហូតដល់រដ្ឋមន្ត្រី ឧបនាយករដ្ឋមន្ត្រី រដ្ឋសភា ព្រឹទ្ធសភា ហើយសម្តេចសាយឈុំ ជាអនុប្រធានគណបក្សប្រជាជនកម្ពុជា ក៏ចេញញត្តិគាំទ្រដែរ។
នៅក្នុងពិធីសម្ពោធផ្លូវ នៅខេត្តព្រៃវែង កាលពីថ្ងៃទី៦ ខែធ្នូ ឆ្នាំ២០២១ សម្តេចតេជោ ហ៊ុន សែន ក៏ប្រកាសជាថ្មីទៀត អំពីការបម្រុងទុកអនាគតបេក្ខភាពនាយករដ្ឋមន្ត្រី ចំនួន ៤រូបរបស់គណបក្សកាន់អំណាច ដោយក្នុងនោះ មានឯកឧត្តម ហ៊ុន ម៉ាណែត កូនប្រុសច្បងរបស់សម្តេចផងដែរ។ ទោះជាយ៉ាងនេះក្តី សម្តេចបានបញ្ជាក់ថា ការដាក់បេក្ខភាពថ្មីទាំងនេះ មិនធ្វើឡើង នៅពេលនេះទេ តែអាចធ្វើឡើង នៅក្រោយឆ្នាំ២០២៨។ លោកបណ្ឌិត ហ៊ុន ម៉ាណែត វ័យប្រមាណ ៤៤ឆ្នាំ គឺជាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក។ លោកបញ្ចប់ការសិក្សា នៅសាលាបណ្ឌិត្យយោធារបស់អាមេរិក West Point។ សម្រាប់កិច្ចការងារនយោបាយ លោកក៏ជាប្រធានយុវជនថ្នាក់កណ្តាល គណបក្សប្រជាជនកម្ពុជា និងជាសមាជិកអចិន្ត្រៃយ៍ ដែលមានវ័យក្មេងជាងគេផងដែរ៕
