ឯកឧត្តម គឹម សន្តិភាព រដ្ឋលេខាធិការ និងជាមន្ត្រីនាំពាក្យក្រសួង យុត្តិធម៌ នៅថ្ងៃទី២៦ ខែមេសា ឆ្នាំ២០២១នេះ បានធ្វើការពន្យល់ណែនាំដល់អ្នកធ្វើដំណើរចេញពីតំបន់ដែលមានផ្ទុះការឆ្លងរាលដាលធ្ងន់ធ្ងរនៃជំងឺកូវីដ-១៩ ទៅកាន់ខេត្ត ដទៃទៀតដែលត្រូវអនុវត្តខ្លួនឱ្យបានត្រឹមត្រូវ។
ការលើកឡើងរបស់ឯកឧត្តមរដ្ឋលេខាធិការ បានធ្វើឡើងដើម្បីពន្យល់បន្ថែមពីសេចក្តីណែនាំរាជរដ្ឋាភិបាលកម្ពុជា ក្នុងការការពង្រឹងការអនុវត្តវិធានការដើម្បីទប់ស្កាត់ការឆ្លង រាលដាលនៃជំងឺកូវីដ-១៩ និងការពង្រឹងការអនុវត្តវិធានការនៅក្នុងភូមិសាស្ត្រដែលត្រូវ បានបិទខ្ទប់។
ក្នុងទំព័រហ្វេសប៊ុកផ្ទាល់ខ្លួន ឯកឧត្តម គឹម សន្តិភាព បានបញ្ជាក់ថា សម្រាប់អ្នកធ្វើដំណើរ ចេញពីតំបន់ដែលមានផ្ទុះការឆ្លងរាលដាលធ្ងន់ធ្ងរ នៃជំងឺកូវីដ-១៩ ទៅកាន់ខេត្តដទៃ ត្រូវ៖
-យកសំណាក និងធ្វើចត្តាឡីស័ក ចំពោះអ្នកធ្វើដំណើរដែលវិលត្រឡប់មករស់នៅ ឬស្នាក់នៅរយៈពេលវែង (រយៈពេលចាប់ពី១សប្តាហ៍ឡើងទៅ)។
-យកសំណាក និងត្រូវរាយការណ៍ អំពីទីកន្លែងស្នាក់នៅជូនអាជ្ញាធរមានសមត្ថកិច្ច ចំពោះអ្នកធ្វើដំណើរបំពេញការងារ អ្នកធ្វើដំណើរឆ្លងកាត់ ឬអ្នកធ្វើដំណើរស្នាក់ នៅរយៈពេលខ្លី (តិចជាង១សប្តាហ៍) ។
លទ្ធផលនៃការវិភាគរហ័សរកមេរោគកូវីដ-១៩ ដែលអនុវត្តនៅក្នុងភូមិសាស្ត្រ នៃខេត្តមួយ មានសុពលភាពសម្រាប់ភូមិសាស្ត្រនៃខេត្តដទៃ នៅក្នុងថ្ងៃតែមួយ។
គួរបញ្ជាក់ថាសេចក្តីណែនាំរាជរដ្ឋាភិបាលកម្ពុជាក្នុងការពង្រឹងការអនុវត្តវិធានការដើម្បីទប់ស្កាត់ការឆ្លងរាលដាលនៃជំងឺកូវីដ-១៩ និងការពង្រឹងការអនុវត្តវិធានការនៅក្នុង ភូមិសាស្ត្រដែលត្រូវបានបិទខ្ទប់នោះបានបញ្ជាក់ដែរថា ចំពោះអ្នកធ្វើដំណើរដែល មានលិខិតបញ្ជាបេសកកម្មរបស់ស្ថាប័នសាធារណៈ ឬអ្នកធ្វើដំណើរឆ្លងកាត់ ឬអ្នកធ្វើ ដំណើរស្នាក់នៅរយៈពេល ខ្លី (តិចជាង១សប្តាហ៍) គណៈអភិបាលខេត្តដោយសហការ ជាមួយមន្ត្រីសុខាភិបាល ត្រូវរៀបចំការយកសំណាក ទៅវិភាគរហ័សរកមរោគកូវីដ-១៩។
ក្នុងករណីដែលរកឃើញថាវិជ្ជមានមេរោគកូវីដ-១៩ គណៈអភិបាលខេត្ត ដោយសហការជាមួយមន្ត្រីសុខាភិបាល ត្រូវអនុវត្តនីតិវិធីបន្តផ្នែកសុខាភិបាល។ ផ្ទុយទៅវិញ ក្នុងករណីដែលពុំ រកឃើញវិជ្ជមានមេរោគកូវីដ-១៩ អ្នកធ្វើដំណើរនោះត្រូវ បានអនុញ្ញាតឱ្យចូលទៅស្នាក់នៅ និងបំពេញការងារ ដោយត្រូវជូនដំណឹងអំពីទីកន្លែង ស្នាក់នៅដល់អាជ្ញាធរដែនដីមានសមត្ថកិច្ច និងត្រូវអនុវត្តវិធានការសុខាភិបាល នានា ដូចជា ការពាក់ម៉ាស និងការរក្សាគម្លាតសុវត្ថិភាព នៅក្នុងអំឡុងពេលដែលខ្លួន ស្នាក់នៅ។ លទ្ធផល នៃការវិភាគរហ័សរកមេរោគកូវីដ-១៩ ដែលអនុវត្តនៅក្នុង ភូមិសាស្ត្រ នៃខេត្តមួយ មានសុពលភាពសម្រាប់ ភូមិសាស្ត្រនៃខេត្តដទៃ នៅក្នុងថ្ងៃតែមួយ៕