លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលបានឱ្យដឹងនៅព្រឹកថ្ងៃទី៣១ ខែមីនាឆ្នាំ២០២១នេះថា យុទ្ធនាការចាក់វ៉ាក់សាំងកូវីដ-១៩វ៉ាក់សាំងស៊ីណូវ៉ាក់នឹងចាប់ផ្តើមដំណើរការចាក់ជាផ្លូវការចាប់ពីថ្ងៃទី១ខែមេសាឆ្នាំ២០២១ស្អែកនេះតទៅ។
ក្រសួងសុខាភិបាលនឹងចេញសេចក្តីជូនព័ត៌មានមួយទាក់ទងនិងយុទ្ធនាការនៃការចាក់វ៉ាក់សាំងកូវីដ-១៩ប្រភេទវ៉ាក់សាំងស៊ីណូវ៉ាក់នេះ។
លោកជំទាវវេជ្ជបណ្ឌិតបានថ្លែងថា នៅយប់ថ្ងៃទី៣១ខែមីនាឆ្នាំ២០២១នេះរដ្ឋាភិបាលសាធារណរដ្ឋប្រជាមានិតចិនតាមរយៈក្រសួងការពារប្រទេស នឹងផ្តល់ជូនវ៉ាក់សាំងស៊ីណូហ្វាមបង្ការជំងឺកូវីដ-១៩ ដែលជាជំនួយឧបត្ថម្ភលើកទី២ចំនួន៧០ម៉ឺនដូសជូនក្រសួងការពារជាតិព្រះរាជាណាចក្រកម្ពុជា ដែលជំនួយឧបត្ថម្ភនេះនឹងដឹកតាមយន្តហោះរបស់កងទ័ពជើងអាកាសសាធារណរដ្ឋប្រជាមានិតចិន។
ពិធីប្រគល់ទទួល នឹងប្រព្រឹត្តទៅនៅអាកាសយានដ្ឋានដ្ឋានអន្តរជាតិភ្នំពេញ ក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង លោក វ៉ាង វិនធាន ឯកអគ្គរដ្ឋទូតសាធារណរដ្ឋប្រជាមានិតចិនប្រចាំកម្ពុជា៕