តូក្យូ៖ នាយករដ្ឋមន្រ្តីជប៉ុនលោក ហ៊្វូមីអូ គីស៊ីដា និយាយថា ខ្លួនមានអារម្មណ៍សោកស្តាយជាទីបំផុត ដែលកូរ៉េខាងជើងបាញ់សាកល្បងសាជាថ្មីទៀតនូវអ្វីដែលគេជឿជាក់ថា ជាគ្រាប់មីស៊ីលផ្លោងបាលីស្ទិក។
លោក គីស៊ីដា បានថ្លែងបែបនេះទៅកាន់អ្នកសារព័ត៌មាននៅថ្ងៃអង្គារនេះ។ លោកបន្តថា ការបាញ់សាកល្បងមីស៊ីលចុងក្រោយនេះ បានកើតមានឡើងបន្ទាប់ពីសមាជិកក្រុមប្រឹក្សាសន្តិសុខអង្គការសហប្រជាជាតិ ក៏គ្រោងនឹងរៀបចំកិច្ចប្រជុំមួយ ដើម្បីពិភាក្សាអំពីវិធីដោះស្រាយបញ្ហាមីស៊ីលដែលកូរ៉េខាងជើងបានបាញ់សាកល្បងកាលពីថ្ងៃទី ០៥ ខែមករាកន្លងទៅផងដែរ។ លោក គីស៊ីដា បន្ថែមថា រដ្ឋាភិបាលកំពុងបង្កើនការប្រុងប្រយ័ត្ន និងការតាមដានរបស់ខ្លួន ដោយលោកបានណែនាំមន្ត្រីអោយខិតខំប្រឹងប្រែងអស់ពីសមត្ថភាព ដើម្បីប្រមូល និងវិភាគព័ត៌មាន ក៏ដូចជាផ្តល់ព័ត៌មាននោះដល់សាធារណជនអោយបានលឿន និងត្រឹមត្រូវ។
បើតាមយោធាកូរ៉េខាងត្បូង និងឆ្មាំសមុទ្រជប៉ុន កូរ៉េខាងជើងបានបាញ់នូវអ្វីដែលគេជឿជាក់ថា ជាមីស៊ីលបាលីស្ទិក នៅក្នុងថ្ងៃអង្គារ៍នេះ ដែលវាជាការបាញ់សាកល្បងលើកទី២ហើយ ក្នុងរយៈពេលមិនដល់មួយសប្តាហ៍ផង ក្រោយមេដឹកនាំប្រទេសនេះជំរុញអោយយោធាបង្កើនសមត្ថភាពបន្ថែមទៀត។ កងកម្លាំងយោធាកូរ៉េខាងត្បូងបានបញ្ជាក់នៅក្នុងសេចក្តីថ្លែងការណ៍មួយថា មីស៊ីលដែលគេសង្ស័យថា ជាមីស៊ីលបាលីស្ទិកត្រូវបានបាញ់នៅចន្លោះម៉ោង ៧៖២៧នាទីព្រឹកថ្ងៃអង្គារ៍នេះ (ម៉ោងក្នុងតំបន់) ចេញពីតំបន់ទឹកដីកូរ៉េខាងជើងឆ្ពោះទៅដែនទឹកភាគខាងកើតឆ្នេរសមុទ្រប្រទេសរបស់ខ្លួន៕
——————————–
សូមចូលរួមជាសមាជិកតេឡេក្រាម https://t.me/lorsovanney
People watch a television news broadcast showing file footage of a North Korean missile test, at a railway station in Seoul on January 5, 2022, after North Korea fired what appeared to be a ballistic missile into the sea off its east coast according to the South’s military. (Photo by Jung Yeon-je / AFP) (Photo by JUNG YEON-JE/AFP via Getty Images)