ហ្វីលីពីននឹងទិញនាវាចម្បាំងចំនួន២គ្រឿង ពីក្រុមហ៊ុនឧស្សាហកម្មធុនធ្ងន់ Hyundai ក្នុងតម្លៃសរុប ៥៥៦លានដុល្លារអាមេរិក។ នេះបើតាមការលើកឡើងរបស់រដ្ឋមន្ត្រីការពារជាតិហ្វីលីពីនលោក Delfin Lorenzana កាលពីថ្ងៃអង្គារកន្លងទៅ។
ថ្លែងនៅក្នុងពិធីចុះហត្ថលេខា លោក Lorenzana បានលើកឡើងថា៖ «គម្រោងនេះនឹងធ្វើឱ្យកងទ័ពជើងទឹកហ្វីលីពីនមាននាវាចម្បាំងធុនតូចចំនួន ២គ្រឿង ដែលអាចមានអានុភាពក្នុងការប្រឆាំងនឹងកប៉ាល់ ប្រឆាំងនឹងនាវាមុជទឹក និងបេសកកម្មប្រឆាំងនឹងយន្តហោះជាដើម»។
ហ្វីលីពីនចាប់ផ្ដើមធ្វើទំនើបកម្មយោធារបស់ខ្លួនចាប់តាំងពីឆ្នាំ២០១០ ដោយកន្លងមកប្រទេសប្រជុំកោះមួយនេះប្រើប្រាស់នាវាអាមេរិក ដែលប្រើប្រាស់តាំងពីជំនាន់សង្គ្រាមលោកលើកទី២មកម្ល៉េះ។
ចាប់តាំងពីពេលនោះមក ហ្វីលីពីនបានទិញនាវាឆ្មាំសមុទ្ររបស់អាមេរិកចំនួន ២គ្រឿង នាវាល្បាតរបស់ជប៉ុន ក៏ដូចជានាវាទម្លាក់ទ័ពចំនួន ៣គ្រឿងពីអូស្ត្រាលី ដោយទាំងអស់នេះសុទ្ធតែជាកិច្ចខិតខំប្រឹងប្រែងក្នុងការពង្រឹងវិស័យសន្តិសុខរបស់ខ្លួន៕
——————
សូមចូលរួមជាសមាជិកតេឡេក្រាម https://t.me/lorsovanney