ភ្នំពេញៈរាជរដ្ឋាភិបាលថៃបានយល់ស្របឱ្យកម្ពុជានាំយកវ៉ាក់សាំងចូលទៅប្រទេសថៃ។ ចំណែកការចាក់វ៉ាក់សាំងជាតួនាទីរបស់ភាគីថៃ ដោយមានខាងកម្ពុជាចូលរួមសង្កេតការណ៍។ ពីព្រោះថាកម្ពុជាមានវ៉ាក់សាំងដ៏ល្អជាច្រើន ហើយរាជរដ្ឋាភិបាលកម្ពុជាកំពុងសិក្សាដោយយកចិត្តទុកដាក់ផងដែរ។ នេះបើតាមការបញ្ជាក់របស់លោក វិស្នុ គ្រឿងង៉ាម ឧបនាយករដ្ឋមន្ត្រីនៃព្រះរាជាណាចក្រថៃ នៅក្នុងជំនួបពិភាក្សាជាមួយឯកឧត្តមបណ្ឌិត សុខ សុក្រឹត្យា ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន និងជារដ្ឋលេខាធិការក្រសួងទេសចរណ៍កាលពីពេលថ្មីៗនេះនៅទីក្រុងបាងកកប្រទេសថៃ។
ប្រភពបានបញ្ជាក់ថា ក្នុងជំនួបជាមួយឯកឧត្តមឧបនាយករដ្ឋមន្ត្រី វិស្នុ គ្រឿងង៉ាម ឯកឧត្តមបណ្ឌិត សុខ សុក្រឹត្យា បានធ្វើការពិភាក្សាពាក់ព័ន្ធទៅនឹងបញ្ហាចាក់វ៉ាក់សាំងកូវីដ-១៩ ដល់ប្រជាពលរដ្ឋកម្ពុជាតាមព្រំដែនកម្ពុជា-ថៃ ថា រាជរដ្ឋាភិបាលកម្ពុជាមានបំណងចាក់វ៉ាក់សាំងកូវីដ-១៩ ដល់ប្រជាពលរដ្ឋកម្ពុជាកំពុងរស់នៅប្រទេសថៃ ប៉ុន្តែក្នុងការអនុវត្តនោះមិនអាចធ្វើទៅរួច ដោយសារជួបការលំបាកលើច្បាប់របស់ប្រទេសថៃ។
ក្នុងកិច្ចសន្ទនាដដែលនេះ លោកឧបនាយករដ្ឋមន្ត្រីថៃ បានជម្រាប ឯកឧត្តមបណ្ឌិតសុខ សុក្រឹត្យា ថា រាជរដ្ឋាភិបាលថៃយល់ស្រប ”ឱ្យកម្ពុជានាំយកវ៉ាក់សាំងចូលមកខាងថៃ។ ចំណែកការចាក់វ៉ាក់សាំងជាតួនាទីរបស់ភាគីថៃ ដោយមានខាងកម្ពុជាចូលរួមសង្កេតការណ៍”។ យ៉ាងណាក្តីជាតួនាទីសមត្ថកិច្ចជំនាញក្នុងការទំនាក់ទំនងធ្វើកិច្ចការនេះ ពីព្រោះថាកម្ពុជាមានវ៉ាក់សាំងដ៏ល្អជាច្រើនហើយ ហើយរាជរដ្ឋាភិបាលកម្ពុជាកំពុងសិក្សាដោយយកចិត្តទុកដាក់ផងដែរ។
ឯកឧត្តមបណ្ឌិត សុខ សុក្រឹត្យា បានបង្ហាញអំពីគោលបំណងក្នុងការកសាងទំនាក់ទំនងល្អរវាងអ្នកនយោបាយខ្មែរជំនាន់ថ្មី និងអ្នកនយោបាយថៃបច្ចុប្បន្ន ក៏ដូចជាការផ្លាស់ប្តូរយោបល់ និងស្វែងរកកិច្ចសហប្រតិបត្តិការលើវិស័យផ្សេងៗ ទាំងក្នុង និងក្រោយដំណាក់កាលនៃវិបត្តិជំងឺកូវីដ-១៩។ ឯកឧត្តមបណ្ឌិតបានបង្ហាញក្តីសង្ឃឹមទុកថា ទៅថ្ងៃអនាគត កម្ពុជានឹងទទួលបានកិច្ចសហការល្អ និងការជួយគាំទ្រពីប្រទេសថៃកាន់តែល្អប្រសើរឡើងថែមទៀត។ ឯកឧត្តមបណ្ឌិត សុខ សុក្រឹត្យា បានលើកឡើងដើម្បីបញ្ជាក់បន្ថែមថា ការមកបំពេញទស្សនកិច្ច និងជួបពិភាក្សាជាមួយរដ្ឋមន្ត្រីក្រសួងផ្សេងៗ និងឯកឧត្តមឧបនាយករដ្ឋមន្ត្រី វិស្នុ គ្រឿងង៉ាម ដោយផ្ទាល់នាឱកាសនេះ គឺ ដើម្បីរឹតចំណងសាមគ្គីភាពជាមួយប្រទេសថៃ ស្របពេលដែលស្ថានការណ៍នៃរបត់នយោបាយកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន កំពុងមានការផ្លាស់ប្តូរលើកិច្ចការសំខាន់ជាច្រើន ដូចជាប្រទេសកម្ពុជាកំពុងមានការកំណែទម្រង់ក្នុងប្រទេសដោយអនុវត្តនយោបាយឈ្នះឈ្នះសម្តេចតេជោដំណាក់កាលទី៤ ជាពិសេស ការកែទម្រង់ខាងផ្នែកច្បាប់ឱ្យកាន់តែប្រសើរឡើង ដោយពេលថ្មីៗនេះបានបើកតុលាការសាលាឧទ្ធរណ៍ថ្នាក់ភូមិភាគបន្ថែមទៀត ដើម្បីបម្រើសេវាជូនពលរដ្ឋឱ្យបានកាន់តែប្រសើរឡើង។ ប្រទេសកម្ពុជាកំពុងធ្វើវិសោធនកម្មរដ្ឋធម្មនុញ្ញដែលបានចែង និងកំណត់ថា ថ្នាក់ដឹកនាំនៃស្ថាប័នកំពូលរបស់ជាតិ ដែលរួមមាន តំណែងប្រធានព្រឹទ្ធសភា ប្រធានរដ្ឋសភា និងតំណែងនាយករដ្ឋមន្ត្រី ជាដើម ត្រូវមាន “សញ្ជាតិខ្មែរតែមួយគត់”។ សម្តេចតេជោ ហ៊ុន សែន បានប្រកាន់យកគោលការណ៍ក្នុងការគ្រប់គ្រងប្រទេស ”បង្កើនថ្មីរក្សាចាស់”។ ក្នុងន័យនេះ គេបានឃើញនាពេលថ្មីៗកន្លងទៅ មានការផ្លាស់ប្តូររដ្ឋមន្ត្រីក្រសួងយុត្តិធម៌ថ្មីវ័យក្មេង បញ្ចប់ការសិក្សាពីបរទេស។ ក្រៅពីនេះក៏នៅមានអ្នកនយោបាយជំនាន់ថ្មីជាច្រើនរូបផ្សេងទៀតដែលបានបញ្ចប់ការសិក្សាពីប្រទេសបារាំង រុស្សី សហរដ្ឋអាមេរិក និងថៃ បាននិងកំពុងឈានជើងចូលបម្រើការផ្នែកនយោបាយ និងកាន់តំណែងជាអ្នកគ្រប់គ្រងក្នុងជួរមន្ត្រីរាជការកាន់តែច្រើនឡើងផងដែរ។
ក្នុងជំនួបនេះដែរលោកបណ្ឌិត វិស្នុ គ្រឿងង៉ាម បានថ្លែងអំណរគុណដល់ឯកឧត្តមបណ្ឌិត សុខ សុក្រឹត្យា ជាថ្មីម្តងទៀតនិងពោលបញ្ជាក់ថា ប្រទេសយើងទាំងពីរមានទំនាក់ទំនងគ្នាល្អប្រសើររៀងរហូតមក ទាំងនេះដោយសារថាថ្នាក់ដឹកនាំប្រទេសទាំងពីរមានទំនាក់ទំនងល្អតាំងពីរយូរលង់។ ហេតុនេះប្រទេសទាំងពីរគួរបន្តកិច្ចសហប្រតិបត្តិការជាមួយគ្នាកាន់តែល្អប្រសើរថែមទៀតជាពិសេសទៅលើវិស័យទេសចរណ៍តែម្តង។ លោកបណ្ឌិត វិស្នុ គ្រឿងង៉ាម បានបញ្ជាក់ផងដែរថា រាជរដ្ឋាភិបាលថៃបានគ្រាំទ្រនយោបាយពង្រឹងវិស័យទេសចរណ៍ក្នុងរឿង “ទិដ្ឋាការតែមួយអាចធ្វើដំណើរបានពីរប្រទេស – Two Kingdoms, One Destination” ។ ដោយឡែកពាក់ព័ន្ធនឹងរឿងការពង្រឹងទំនាក់ទំនងក្នុងវិស័យទេសចរណ៍រវាងប្រទេសទាំងពីរវិញ គឺខាងកម្ពុជាចង់ឃើញវិស័យទេសចរណ៍ប្រទេសទាំងពីរមានលក្ខណៈទូលំទូលាយ ពោលគឺមិនចង់ឱ្យមានអ្វីបង្កជាឧបសគ្គ ថ្មីៗនេះរាជរដ្ឋាភិបាលថៃបានបង្ហាញជំហរជំរុញវិស័យទេសចរណ៍ឱ្យចូលមកកម្ពុជា និងបានដាក់កម្ពុជាក្នុងចំណោមប្រទេសដែលមកប្រទេសថៃដោយមិនបាច់ធ្វើចត្តាឡឹស័ក៕