ភ្នំពេញ៖ ក្រោយភ្លៀងធ្លាក់ជាបន្តបន្ទាប់ ក្រុមបច្ចេកទេសនៃទំនប់វារីអគ្គិសនីកំចាយក្នុងខេត្តកំពត នៅម៉ោង១១៖០០ព្រឹក ថ្ងៃទី១១ ខែតុលានេះ បានបើកបង្ហូរទឹកសន្សឹមៗចេញពីទំនប់វារីអគ្គិសនីកំចាយ ខណៈទឹកកើនឡើងដល់កម្រិតរំដោះត្រូវចេញ។ នេះបើតាមសេចក្តីជូនដំណឹងរបស់គណៈកម្មាធិការគ្រប់គ្រងគ្រោះមហន្ដរាយខេត្ត។
នៅថ្ងៃទី១១ ខែតុលានេះ គណៈកម្មាធិការគ្រប់គ្រងគ្រោះមហន្តរាយខេត្តកំពត បានចេញសេចក្តីជូនដំណឹងស្ដីពីការបើកទំនប់វារីអគ្គិសនីកំចាយ ដើម្បីរំដោះទឹកចេញ បន្ទាប់ពីមានភ្លៀងពីរបីថ្ងៃជាប់គ្នា។ បើតាមសេចក្ដីជូនដំណឹងខាងលើ ស្ថានភាពក្នុងអាងស្ដុកទឹកទំនប់វារីអគ្គិសនីកំចាយ មានការកើនឡើង តម្រូវឱ្យក្រុមបច្ចេកទេស បើកទំនប់បង្ហូរទឹកចេញនៅម៉ោង ១១៖០០ព្រឹកនេះ។
គណៈកម្មាធិការគ្រប់គ្រងគ្រោះមហន្ដរាយខេត្តកំពត ថា៖ «ក្រុមបច្ចេកទេស បានបើកទឹកបង្ហូរសន្សឹមៗសិន ដើម្បីកុំឱ្យជន់ខ្លាំង។ បច្ចុប្បន្ននេះ ទឹកឡើងដល់កម្រិត១៤៨សង់ទីម៉ែត្រ ដែលជាកម្រិតប្រកាសអាសន្ន។ បើមើលតាមធម្មតាមិនទាន់ជន់ខ្លាំងទេ តែត្រូវតែរំដោះចេញខ្លះ ដើម្បីឱ្យទឹកមានកម្រិតស្មើដូចធម្មតា និងជាការជូនដំណឹងដល់ពលរដ្ឋក្នុងតំបន់ រួមជាមួយទេសចរ ដែលទៅកម្សាន្ដនៅតំបន់នោះបានត្រៀមជាមុន»។
ទន្ទឹមនឹងនេះ គណៈកម្មាធិការគ្រប់គ្រងគ្រោះមហន្ដរាយខេត្ត និងរដ្ឋបាលខេត្តកំពត បានអំពាវនាវឱ្យពលរដ្ឋទាំងអស់ប្រុងប្រយ័ត្ន និងរៀបចំការពារខ្លួនទឹកជាមុន ទាក់ទងការបញ្ចៀសនូវគ្រោះថ្នាក់ដែលអាចនឹងកើតឡើងជាយថាហេតុ។
គួរបញ្ជាក់ថា ទំនប់វារីអគ្គិសនីកំចាយ មានទីតាំងស្ថិតនៅស្ទឹងកំចាយ ឃុំម៉ាក់ប្រាង្គ ស្រុកទឹកឈូ ខេត្ដកំពត៕